قصيدة بعنوان ( قلبي عضمة طرية )

وكأن ف روحي نفختِ صحيت

من آخر باب جوَّاني يا حُب عليَّ ناديت

لقيتني وأنا المحروم من ريحة حُب ............ لقيت

من بعد ما كنت الجامد جدا زي الحيط

من لمسة قُرب بدوب فتافيت

لقيتني بفوق

من همِّي بفوق

وبهِّم لفوق

ولأوِّل مرَّة لشمسي يشُق شروق

وبدوق م الشوق

من غير ما تعِّد عليَّ عيون الوقت .......

ف لُقم الفرحة وتفرض طوق

معقولة أنا وحدي بعدِّي ف خطوة بحور الخوف !!!!!!!!!!!!!!!

معقولة أنا عنِّي حجاب الخوف مكشوف وبشوف !!!!!!!!!!!!!!

معقولة ف شفطة أنا بشرب كُل بحور الشهد !!!؟؟؟

من غير ما عليَّ الساقي يعد !!!؟؟؟

.................................................

.................................................. ....................

الله يجازيك يا شيطان الشَّك

كان لازم يعني تفُك ( الخُرج ) وترمي ف عبِّي سؤال : .......

معقولة أنت أول واحد يقطف ؟؟؟

مش عارف أو مش عايز تعرف ؟؟؟؟

ها تبَّرر زي عوايدك ؟؟؟؟

ها تلِّف تدور وتفلسف ؟؟؟؟

..........................................؟؟؟؟؟؟؟؟ ؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!!!!!

يا شيطان الشك ها اطاوعك

وها سلِّم إنك عندك حق

وإني مش أوِّل واحد حاول مد إيده وخطف عنقود

أو جاب ف إيديه فرط الرُمَّان

الله يجازيك فتَّحت بيبان

وريتني إزاي أنا واحد عاش ممزوع

أنا واحد شبعان جوع

مش شايف غير يجي ألف قناع مزروع

لوشوش متعدِّش شكل ونوع

................................................

ها تُرد عليَّ أو ما تُردش

ما أنت خلاص .....

رميت الطوبة المعطوبة

ف بحيرة قلبي ال.كانت ساكنة سكون المية ف حنك الزير

فتَّحت عنيا وخدت إيديا لقعر البير

آه لو كنت شوية صعبت عليك

لو قلت لروحك سيبه دا طفل

مهوَّ اش حمل

خلِّيه ف الفَرح يفوت

ويفرفر فيه ويموت

الله يجازيك يا شيطان

طواحين ف دماغي بتمضغ كُل الفاضل فيَّا

ولا ألف سؤال واقفين ف طابور

كُل سؤال مستني يجيه الدور

ويدعك قلبي كأنه وابور

ويحلف زور

حبكت يعني !!!!؟؟؟؟

ما أنا عمري بحاله بعدِّي عليك

ولا بيني وبينك فيه شبابيك

لاف مرَّة ناديتني وقلت تعاليَ

ولا مرَّة مشيت ويَّاي لأخر الشارع

جاي دلوقتي ف وقتي الضايع

تفتح سكة يا عالم إيه آخرتها

وكأنه عليَّ كتير لو شفت يومين !!!!!!!!!!!!

ومضغت بطرف لساني ( منين ) !!!!!!!!!!!!!!!!!!!

وغمر علي قد ما يقدر قلبي حنين

دا أنا لسَّه بمِّد إيديا وأقول :

دلوقت هانول

دلوقت ها اطووووول

ليه تسمِّم طعم الهمس وطعم القول

!!!!!!!!!!!!!!!!!!!!!!!!!!!!!!!!!!!!!!!!!

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

قصيدة بعنوان ( قلبي عضمة طرية ) 10532

» البحر مابيكلمش حد ( قصيدة عامية مصرية )
» شاب مصري يكتب قصيدة عامية اهداء لوالدته التى توفاها الله